Umbono, umgomo, emagugu

Umbono

Umphakatsi londlondlobalako nalolinganako lophila ngeluvano nemitfombo yetfu yemvelo.

Umgomo

Kuniketa ngebuholi ekuphatfweni kwemvelo, kongiwa kanye nekuvikela ngasekusimameni kute kuzuze bantfu baseNingizimu Afrika kanye nemphakatsi wemhlaba.

Emagugu

Siholwa Lugcozi lwetfu njengebaphatsi nemancusa emvelo, kufanele Sikhutsale futsi sikhutsate kucabanga lokusha netisombululo ekuphatfweni kwemvelo lokusekelwe endleleni legcile Kubantfu leyemukela kubaluleka kwe-Batho Pele, ngobe kulapho sibeka khona bantfu kucala lesitawubasentela Ngebucotfo, sitsako lesibalulekile enhlanganweni leholwa Kusebenta lokusetulu njengalena yetfu.

Inshisekelo

• Sinenshisekelo ngemagugu etfu futsi siphila ngawo emisebentini yetfu yangemihla
• Sitinikele emsebentini wetfu futsi sihamba libanga lelengetiwe
• Sikhombisa kutichenya ngeligunya, ngemgomo nangembono wetfu
• Njengebaphatsi nemancusa emvelo, siniketa umsebenti losezingeni lelisetulu emphakatsini waseNingizimu Afrika
• Sakha futsi sikhutsate indzawo yekusebenta leniketa emandla nalekhutsatako
• Sikhutsata ngekuciniseka futsi simela imibono yetfu, imiyaleto kanye nesitfunti setfu

Kugcila ebantfwini

• Sikhombisa kuvuleleka nekufisa kufundza kulomunye naloomunye nekwesekela labanye emtamweni wabo wekufundza nekwandzisa emandla abo.
• Siyahlonipha futsi sidvumisa emandla awo wonkhe umuntfu
• Sibonisa luvelo nangabe sichumana nalabanye
• Sibonisa simo sebuchwepheshe nekutetsemba, ngisho nasetimeni letimatima
• Sisebentisa ligunya lelinebumnene
• Siyasekelana futsi siyasitana
• Sikhutsata kusimama kwemphilo yasemsebentini

Bucotfo

• Senta tincumo letinelwati kute sitfutfukise imiphumela futsi silawule bungoti
• Sitiphatsa ngendlela lelungile futsi sibhekana futsi silungise kutiphatsa lokungenasimilo
• Sivumela futsi simeme inkhulumomphikiswano lecotfo - silalela kucala kute sivisisane
• Sihlonipha bonkhe bantfu, ngekhatsi nangaphandle kwenhlangano, ngekwehlukahlukana kwabo, ngemandla, ngetitayela nangemibono, ngaphandle kwekubuka sikhundla sabo.
• Sitsembekile futsi sigcina tibopho tetfu netitsembiso lesitenta kulabanye
• Sichuba i-ajenda ye-DFFE, kunekutsi siphisheke ngetinshisekelo tetfu
• Siyasesekela sincumo nangabe sesitsintsiwe futsi siyasekela siphindze sibe nembono lomuhle ngalabanye nangabe sehlukene

Kusebenta

• Sigcile emiphumeleni yetfu lebalulekile futsi siphatsa imisebenti lebambelela imphumelelo yabo nobe lengangeti linani kuloku
• Siyakwemukela kutiphendvulela ngetincumo tetfu, tento kanye nemiphumela
• Sisebenta njengelicembu, sisebentisa emandla ebantfu ngekwehlukana kute sivikele imiphumela yetfu
• Sibonisa simo sengcondvo ‘sekwenta’ futsi silwela kuletfwa kwemiphumela ngekushesha
• Sisita labanye kutsi bente lokusemandleni abo ngekuniketa imphendvulo levulekile nangekusekela tinhlelo tabo tekutfutfukisa ngekwehlukana
• Sibandzakanya bonkhe bantfu labatsintsekile etinhlelweni tetfu, etinhlosweni nasetincumweni tetfu

Kutisukumela

• Sikhutsata kucabanga lokusha netisombululo
• Semukela isayensi letfolakalako lencono kakhulu, lwati kanye nekwenta
• Sinengcondvo levulekile, sitimisele kulalela nekufundza kulabanye
• Silwela kwenta ncono futsi sichuba siphindze sisekele luntjintjo
• Sibambisana kuto tonke tinhlaka tenhlangano futsi sidzilita emasayilosi lakhona
• Sisebenta ngekubambisana nebalingani betfu nebabambilichaza, sisungula futsi siphishekele imigomo leyabiwe

Sibutsetelo seligunya nemisebenti yeLitiko Letemahlatsi, Tinhlanti Netemvelo

Ligunya lelisemtsetfweni kanye nebhizinisi lengumgogodla yeLitiko Letemahlatsi, Tinhlanti Netemvelo (i-DFFE) kuphatsa, kuvikela kanye nskulondvolota imvelo yaseNingizimu Afrika kanye nemitfombolusito yemvelo. Ligunya lisekelwe esigabeni 24 seMtsetfosisekelo weRiphabhulikhi yaseNingizimu Afrika, wanga-1996 (Umtsetfo nombolo 108 wanga-1996), loniketa wonkhe umuntfu lilungelo (a) lokuba nendzawo lengasiyo ingoti emphilweni nobe kunhlalakahle yakhe; kanye (b) nekutsi indzawo ivikelwe kute kuzuze titukulwane tamanje netesikhatsi lesitako, ngemtsetfo lofanele kanye naletinye tindlela.

Kute kuphunyeleliswe lelilungelo lemvelo lelikumtsetfosisekelo kanye nesidzingo sekuphatfwa kwemvelo ngendlela lefanele kanye nentfutfuko lesimeme, i-DFFE yasungula luhlaka lwemtsetfo/lwekulawula kuphatfwa kwemvelo loluphelele. Loluhlaka lwekulawula luhlanganisa tento tephalamende (imitsetfo yetemvelo), imitsetfotimiso, tinchubomgomo, imitsetfo nemigomo kanye nalamanye emathulusi ekulawula lekuhloswe ngawo kukhutsata tinchubo letifanele tekuphatfwa kwemvelo kute kuvikelwe futsi kugcinwe imvelo kute kuzuze titukulwane tamanje netesikhatsi lesitako.

Ngetulu kwekuttfutfukiswa, kusetjentiswa kanye nekubuyeketwa lokuchubekako kweluhlaka lwekulawula lolunenchubekelembili lwekulawulwa kwemvelo ngendlela efanele, lokunye kungenelela lokubalulekile kwekulawulwa kwemvelo lokwentiwa yi-DFFE kubandzakanya kwatisa ngetindzaba letibalulekile temvelo kanye nekukhutsata lisiko lekushisekela imvelo phakatsi kwetakhamuzi jikelele, kwakha likhono ngaphakatsi kwemkhakha, kanye nekusungula nekucinisa budlelwano bavelonkhe, betifundza nebemhlaba wonkhe kute kubhekwane netinsayeya letifanako tetemvelo.

Umbono wesikhatsi lesidze we-DFFE kuba “nemphakatsi lophumelelako nalolinganako lophila ngeluvano nemitfombolusito  yetfu yemvelo”, njengobe kuvetwe eluhlelweni lwetfu lwemasu esikhatsi lesimaphakatsi. Kwesekela kuphunyelelwa kwalombono, i-DFFE ibone tinjongo temasu lasihlanu, langalendlela:

• Umnikelo wetemnotfo wemvelo utfutfukisiwe;
• Bucotfo betemvelo buvikelekile futsi butfutfukisiwe;
• Ingucuko kutenhlalo ngekhatsi kwemiphakatsi yetfu;
• I-ajenda yemhlaba wonkhe ifakwe umoya futsi kuhlangabetwane netibopho; futsi
• Litiko lelinelikhono nalelisebenta kahle.
  
  

I-DFFE ihlelwe yaba tinhlelo temcombelelotimali letiyimfica. Luhlelo ngalunye lulandzela isethi yemiphumela yemasu laboniwe, lekuhloswe ngayo kuzuza tibopho te-DFFE eluhlelweni lwemasu lweminyaka lesihlanu futsi ekugcineni lube nenchubekelaphambili ngekulandzelana ekuphunyelelisweni kwembono wesikhatsi lesidze we-DFFE.

Tinhlelo, tinhloso kanye nemiphumela yemasu

Luhlelo 1: Kuphatsa 

• Inhloso: Kuniketa ngebuholi lobunelisu, kuphatsa netinsita tekwesekela kulitiko.
• Imiphumela Yemasu:
  
  • Kuphatsa lokuhle nekuhambisana netidzingo temtsetfo kanye nekuphatfwa kwetimali ngemphumelelo
  • Ligalelo lelitfutfukisiwe ekuguculweni kwetenhlalo-mnotfo kanye nekuhlonyiswa kwemiphakatsi leyayincishwe ematfuba ngaphambilini
  • Basebenti labanemakhono lanele kanye nembutfo lonemandla lohlelwe kabusha futhi lomele buhlanga nebulili baseNingizimu Afrika
  • Kutfutfukiswa kwelikhono lebasebenti bemkhakha

Luhlelo 2: Kutfotjelwa Kwemtsetfo kanye Nekucaphelwa Kwemkhakha

• Inhloso: Kukhutsata kutfutfukiswa kweluhlelo lwetemtsetfo lolusitako kanye neluhlelo lwekugunyatwa kwemalayisensi lolutawugcugcutela kuphocelelwa nekutfotjelwa kwemitsetfo, futsi lucinisekise kuhlelenjiswa kwekusebenta kwemkhakha.

• Imiphumela Yemasu:
  
  • Kulandzelwa lokutfutfukisiwe kwemitsetfo yetemvelo futsi netinsongo temvelo kuncishisiwe
  • Tinhlaka tekulawula kuphatfwa kwemvelo letihambisanako, tinhlelo, emathuluzi netisetjentiswa
  • Kutfutfukiswa kwelikhono lebasebenti bemkhakha

Luhlelo 3: Emalwandle nemaSentfo

• Inhloso: Kukhutsata, kuphatsa kanye nekuniketa ngebuholi lobunelisu ngekulondvolowa kwemalwane nemasentfo
• Imiphumela Yemasu:
  
  • Tinsongo kubucotfo bemvelo tilawuliwe futsi luhlelo lwemvelo lulondvolotiwe
  • Kuchumana, isayensi kanye nenchubomgomo kucinisiwe

Luhlelo 4: Kuntjintja Kwesimo Selitulu, Ikhwalithi Yemoya kanye Nekutfutfukiswa Lokusimeme

• Inhloso: Kuhola, kukhutsata, kuhlelembisa, kwatisa, kucaphela kanye nekubuyeketa kulinganiswa kwekusimama kwemvelo, kukhishwa kwekhabhoni lephasi, nekumelana nesimo selitulu kanye nelizinga lemoya ekugucukeni kweNingizimu Afrika iye entfutfukeni lesimeme.
• Imiphumela Yemasu:
  
  • Luntjintjo lolulungile loluya emnotfweni wekhabhoni lephasi kanye nemphakatsi lokwati kumelana nesimo selitulu
  • Tinsongo kukhwalithi yetemvelo nasemphilweni yebantfu tincishisiwe
  • Kubambisana kwemave ngemave lokusekela tintfo letibalulekile tentfutfuko lesimeme/yemvelo eNingizimu Afrika

Luhlelo 5: Tinhlobonhlobo tetintfo letiphilako Nekongiwa kwemvelo 

• Inhloso: Kucinisekisa kulawulwa nekuphatfwa kwetinhlobonhlobo temvelo, emagugu kanye netindzaba tekongiwa kwemvelo ngendlela lekhutsata kukhula kwemnotfo lokusimeme nentfutfuko.
• Imiphumela Yemasu:
  
  • Tinhlelo temvelo tilondvolotiwe, taphatfwa futsi tasetjentiswa ngalokusimeme
  • Tinsongo tetinhlobonhlobo tetintfo letiphilako tincishisiwe
  • Kufinyelela lokutfutfukisiwe, kwabelana lokufanelekile nalokulinganako kwetinzuzo

 Luhlelo 6: Tinhlelo Tetemvelo

• Inhloso: Kucalisa luhlelo lolwandzisiwe lwemisebenti yahulumende kanye nemiklamo yemnotfo lonakekela imvelo emkhakheni wemvelo
• Imiphumela Yemasu:
  
  • Kudalwe imisebenti lehloniphekile futsi lesimeme, kubekwe phambuli lusha, bantfu labasikati kanye nebantfu labakhubatekile
  • Tinhlelo temvelo tivuselelwe futsi taphatfwa
  • Kuphatfwa kwemlilo lokuhlanganisiwe
  • Sakhiwonchanti, intayeketo kanye nekunciphisa tinhlekelele
  • Kutfutfukiswa kwelikhono lebasebenti bemkhakha

Luhlelo 7: Kuphatfwa Kwemakhemikhali Nemfucuta

• Inhloso: Kuphatsa kanye nekucinisekisa kutsi tinchubomgomo nemitsetfo yekulawulwa kwemakhemikhali nemfucuta kuyasetjentiswa futsi kuyaphocelelwa ngekuhambisana nemagunya, ticondziso netivumelwano tekuphatfwa kwemakhemikhali.
• Imiphumela Yemasu:
  
  • Tinsongo kukhwalithi yetemvelo nasemphilweni yebantfu tincishisiwe
  • Umkhakha wahulumende wendzawo lonelikhono lelanele lokhona kwenta umsebenti wawo wekuphatsa imvelo ngemphumelelo.

Luhlelo 8: Kuphatfwa Kwemahlatsi

• Inhloso: Kutfutfukisa nekuhlelembisa kuphunyeleliswa kwetinchubomgomo kanye netinhlelo letihlosiwe kucinisekisa kuphatfwa kwemahlatsi, kusetjentiswa lokusimeme nekuvikelwa kwemhlaba nemanti, kanye nekuphatfwa kwebungoti netinhlekelele tetekulima.
• Imiphumela Yemasu:
  
  • Kukhicitwa lokusimeme kwamahlatsi ahulumende
  • Umkhakha wemahlatsi lohlelwe kabusha ngekuhambisana neluhlelo loluyinhloko
  • Emahlatsi endzabuko aphetfwe futsi alawulwa ngalokusimeme
  • Tinsongo kukhwalithi yetemvelo nasemphilweni yebantfu tincishisiwe

Luhlelo 9: Kuphatfwa Kwetetinhlanti

• Inhloso: Kucinisekisa kusimama, kusetjentiswa kanye nekufinyeleleka lokuhlelekile kwemitfombolusito lephila elwandle ngekuphatfwa lokutfutfukisiwe kanye nekulawulwa
• Imiphumela Yemasu: 
  
  • Luhlaka lekulawula lolusebentako lekuphatsa nekutfutfukiswa kwemitfombolusito lephilako yaselwandle neyasemantini lahlantekile (emalwandle, emasentfo, imifula nemadamu)
  • Umkhakha lophetfwe kahle wetekudoba kanye netekulima tasemantini losimamisa futsi lotfutfukisa kukhula kwemnotfo kanye nentfutfuko
  • Timo tenhlalo-mnotfo yemiphakatsi ledobako tentiwe ncono